WGH Dalu block-ni ning·o man·gipa Sesengpara songo Bandra chibimako gital kabatgipa dolongko Chief Minister Conrad Sangma mijal salo jakkalnagita oprake on·angaha. Ia dolongko rikna World Bank tangka chamataha. Dolongni bakroa 80 metre mang ong·a jean Sesengpara-Kherapara ramaoni Dombagre songona sokatgen.
Gitcham bolni dolong 2022 bilsio mikka jimbee wae chi man·pakenba nosto ong·aha. Dalu jolo ia somoio bang·aan nisiatako man·aha. Da·o ia gital dolongko gong 2.08 crore tangkarangchi ringtaipilaha jekon Chief Minister Conrad Sangma nangchongmotgipa kam aro sak 2000 mang manderangna jakkaltogipa ong·gen ine program-o aganangaha. Ia jal·langko rikmananichi km 11 mangnigita ja·achi re·na nangako bakandikataha.
Ia dolongko rikaniko manderangna neng·nikaniko olgrokatna dikdiksana cholko bikotaigipasan ong·a aro sorkari ru·utgijaan RCC bridge project-ko a·bachengatgen ine Sangma parakangaha. Bang·a songrangon dolongrang dongjae cheltanggrikata aro namgniko man·tokjaenga, sorkari pilakkon namdapatna raken kam ka·enga ine ua aganangkuaha. Sangma, ia somoio Dalu block-ni ning·o dangdike on·enggipa doctor rang, skigiparang, officer-rang, songsalko dilgiparang, NGO-rang aro gipin songdonggipa manderangkoba grongaha aro uamangni agananirangko knae ra·angaha.
