Sukrobar sal, March 28 tariko School Programmes in Articulation, Resilience & Kindness (SPARK) Summit 2025-ko Tura District Auditorium-o ong·atangaha.
Ia program-o Chief Minister Conrad Sangma mongsonggipa sokgipa ong·e bakko ra·angaha. SPARK program-ara a·dok sorkarini Education Department-ni ning·o a·bachengatgipa Samagra Shiksha program nigita ong·a.
Ia program-ara chatro chatrirangna lekka poraiakosan on·aigija, uamango ka·donganiko ra·bana dingtang dingtang kamrango changa sapanirangko aro janggi tangani cholrangko on·a miksonganiba ong·a. Unbaksana West Garo Hills-ni dingtang dingtang skulrango chatro chatrirangni dakbewal, ka·dongani aro poraianirango dingtanganiko ra·bana ia SPARK program dakchakanggen ine Chief Minister Conrad Sangma aganangaha.
Education Department-ni Secretary aro State Project Director Swapnil Tembe, SPARK outcome Report-ko on·ange, ia program-ni ning·o chu·sokanirangko skanggipa jinmana talate on·angaha.
Ia program-o SPARK-ni dilanichi chu·sokgipa ong·anina dingtang dingtang skul-ni principal-rang, skigiparang aro chatro chatrirangko mande ra·angan baksana tablet-rangkoba suale on·angjolangaha.
