Re∙anggipa March 29, 2025 tariko Guwahati songjinmani NEDFi Convention Centre-o ong∙atanggipa National Tribal Film and Literature Festival-o A·chik jawilwat “Chanchisoa” Best Cinematography ko man∙angaha. Ia jawilwat ko Director Elvachisa Ch. Sangma tariaha jean cinematography rangni gisepo nambatsranggipa ong·e ia award ko man∙e Garo Hills ni manderangna mikkim rasong ko ra·baaha.
Chanchisoa film-ara Assam ni Dr. Bhupen Hazarika Regional Television and Film Institute ni chang 19 gipa Batch ni Diploma Film ong·a jekon Elvachisa Ch. Sangma ni segimin golpo ko jawilwat tariaha. Ia jawilwat ara A·chik ku·sikchi tarigipa ong∙a aro golpo chu∙gimikon A·chik a·songon tariangaha. “Chanchisoa” minute 29-ni jawilwat ong·a jekon Garo Hills-ni nokdango tangka paisanigita neng·nikaniko chagronganio pangchake tariaha. Ia jawilwato ma·gipani neng·sikimani, pagipani mikkangchake kamrangko jotton ka·ani, dedrangrangni nama gadango poraina miksonganiko, jikgipani nokdangoni matnanganirangko man·e janggi tanganiko aro songsalni mandeskana ka∙dongsoani ba nichaksoaniko mesokaha.
Ia jawilwat ko chang 18-gipa Mumbai International Film Festival (MIFF) 2024 o National Competition ni ning·o skanggipa changna mesokangaha jeon Best Student Film award ko man·baaha. Uni joljolan ia jawilwat ko Goa International Film Festival of India (IFFI), Bengaluru International Short Film Festival (BISFF) 2024, North East Currents section ni 2nd Eikhogi Imphal International film festival, Indian National Film Festival of Australia 2025 aro chang 9 gipa Brahmaputra Valley Film Festival 2024 o mesokangaha jeon Best Short Film award ko man·aha.
Una agreba ia jawilwat, Best Director ni gadangna Bidyut Chakraborty Award ko man∙baaha aro 3rd NEFVTA Film Festival 2024-o NEFVTA Award ko best Cinematography na man·angskaaha.