A·dok sorkari gital chu dokanrangko kulina license on·aniko dikdiksana dontongataniko Mongolbar salo Excise-ni Minister in-charge Kyrmen Shylla parakataha.
Gitalgipa licence-rangko on·taipilna skanggipa name dake nipiltaianiko dakchengan baksana gitalgipa niamrangko ja∙rikesa license-rangko on·angna miksonganiko Minister aganangaha. Iani bidingo biaprangko nigrikesa chu dokanrangko bariatna aro dontongatna kamrangko ka∙anggen ine Shylla aganangaha.
Da·o dongenggipa chu dokanrangni nokgiparang adita salrangna skang chu dokanrangni agre bang·ani a·selo chu palanirang komianiko agananirangkoba Kyrmen Shylla janapangaha. Chu dokanrangko bida pakwatchakram aro olakiram nok sepangjolo kulianiko department-nigita nirokanganiko dakangna aro licence-rangko songni Nokma-ni NOC donggipanasa on·anganikoba aganangaha.
Iana agreba Excise-o kam ka·giparangni somoi gita biaprangona re·ange nirokaniko dakenganikoba Shylla janapangaha.
