South West Garo Hills a·jao Arts, Commerce aro Science-ko class XI o poraienggipa ge 13 skulrangni sak 925 chatro chatrirangna digital-nigita pora skianiko namdapatna Lava M-TAB ko sualangaha. Ia program-ona Mahendraganj MLA Sanjay A. Sangma mongsonggipa ong·e sokbaaha. Unbaksa, a·jani DC Hema Nayak, ADC, BDO, SEO, School Principal-rang aro gipin official-rang sokbatokaha. Distribution Ceremony-ko District Administration aro Education department bakrime ong·ataha.
MLA Sanjay A. Sangma, ia chasongo pora skiani a·bao digital-ni ostrorangko jakkalna nangani gamchataniko aganangaha. Ian sorkarini e-learning ko pilakona sokatna niksamsoe dakenggipa ong·a aro technology-ko pora skiani a·bao jakkalna miksongani ong·a. Digital-nigita skie ra·aniko name jakkala ong·ode poraianio chu·sokna man·gen indioba jakkalsretode namgijanirang sokbagen ine Sangma aganangaha.
DC Hema Nayak, uni agananio pora skiani a·bako namdapatna sorkarini kam ka·aniko nike katchaaniko parakangaha. Ru·utgija somoirangna skang sualgipa CM Impact booklet, unbaksana bi·sarang fail ong·e bilsirang noksan ong·janagita bilsio changgni SSLC poraikkako sena on·aniko Nayak janapangaha.
SEO, Tapos Marak, a·jao SSLC aro HSSLC porikkarango chu·sokronggijaniko janape bi·sarangko namgipa result-rangko man·a digital-ni ostrorangko jakkale krenge poraichina didiangaha. SDSEO Emphul Marak, sorkarini ia re·mikkanganina ka·dongsoaniko parakangaha aro indakgipa program-rangko ong·atanichi chatro chatrirangni u·i ma·sianiko aro pora skianiko namdapatgen ine aganangaha.
