2025 April jani 2 tariko a·dok sorkari railway aro winter capital ni gimin chanchirimna all-party committee ko songangna tik ka·aha. Ia all-party committee-o pilak political party rang bak donge apsan dake Meghalaya-o railway ra·bana miksongani aro winter capital ni bidingo chanchirimaniko dakanggen. Ia Committee ko Chief Minister ba Chief Minister ni seokgipa Minister ni dilanio re·dilanggen.
A·dok sorkari ni u·iatgimin-o pangchake pilak political party rangko committee na sakgni dilgiparangko seokna mol·molataha. Ia committee ni bidingo jako ra·enggipa department rangko tom·anio aro chanchirimani somoio bak ra·china okamgen ine u·iatangaha.
Winter Capital ko Tura-o songna dabianiko name dake porikka ra·e ma·sie ra·na aro pilak NGO, Civil Society rangni a·doko damgni skotong songjinmako ra·bana nangnikgipani namgni aro namgijanirangko ba neng·nikanirangko tosusae nianganiko dakangna tik ka·aha. Una agreba pilak manderang aro dingtang dingtang dolrangni chanchianiko ma·sie ra·ani ja·mano a·dok sorkari na report watani kamko Committee ka·angskagen.
Meghalaya a·doko maikai railway ko ra·bae rika cho·anirangko a·bachengatna dingtang dingtang cholrangko bikotna committee kamko ka·anggen. Railway ko ra·baanio tangka paisa man·dapani aro namgnirangni bidingo nipiltaianiko committee ka·angan baksana pilak bak donggipa manderangni chanchianirangko niroke a·dok sorkarina didiataniko on·anggen.
