Tura songjinmao manderangko mikkronna simsakani bidingo u·iatna aro kana ong·gnioni chel·chakna Free Eye Screening Camp-ko Doordashan Kendra (DDK) Office Complex-o antisana ong·atangaha. Ia camp-ko DDK Tura, District Medical & Health Department aro Mankachar Assam-ni Brahmaputra Eye Care Centre bakrime ong·ataha jeon manderangko koros nanga gri porrika ra·e nina cholko on·angaha.
DDK Tura-ni Program Executive, Kamlesh Koch, screening camp-ni bidingo talatengon ia camp-ko National Blindness Control Week-ko maniani bakgita April 1-oni 7 tarikona bilsi antian ong·atronga ine aganangaha. Ia camp-ko ong·atani miksonganiara kana ong·gnioni chel·chake rakkina, mikron check-up ka·aniko ranta ka·jringna aro mikronni sabisioni naljokna nanggni kamrangko manderangna mikrakataniko ra·bana ong·ataha ine Koch agandapangaha.
Mankachar Brahmaputra Eye Care, DDK Tura-ni okamataniko man·e cataract aro gipin mikronni sabisirangko ia camp-o manderangna koros gri porikka ra·an baksana mikrakate on·angaha. Iana agreba ia eye care centre-o cataract surgery-rangkoba Kolkata aro Chennai-ni eye surgeon-rang ka·e on·enganiko Director Tapas Dharkoros u·iataha.
Camp-ko ong·atani gisepo West Garo Hills ni District Health and Medical Department-ba manderangna koros nanga gri eye care screening-ko ong·ataha. Uamangni screening ka·aniona sepang jolni school bi·sarang, manderang aro department-rang sak 170-na baten re·bae bak ra·etokaha.
