West Garo Hills a·jani Tura Sadar Division-ni ning·o sorkari office-rango kam ka·enggipa manderangko, Deficit aro Adhoc school-ni skigiparangkoba man·chape, NFSA (PHH aro AAY) card donggiparangko Food and Civil Supplies & Consumer Affairs-ni u·iatagita April 30 tarikna skang on·pilchina Deputy Commissioner (Supply) ge·etataha.
Ia card-rang kangal cholgrirangna on·gipasa ong·a jekon sorkarini ning·o kam ka·giparang namgniko ra·e dongenga. Uamangni biapo Person With Disabilities (PWD) ba be·en bimangnigita bilgrigipa aro cha·asigipa manderangna on·a tik ka·skaaha. Dongimin somoio card-rangko on·piljaode niamo pangchake dakna nanggniko jako ra·gen ine u·iataha.
Iani bidingo, Nokmarang, Fair Price Shop dealer-rang aro Fair Price dokanrangko nirokenggipa Vigilance Committee-rangko iadake namgniko ra·enggipa nokdangrangko am·sandienba card-rangko DC office (Supply) o man·gipa form-o gapate on·pilchinagita didichina ge·etataha.
