Tura songjinmani dam dok biaprangko chong·motan Super Market, Nazing anti, Ringrey, Hawakhana, Chandmari aro Araimile-ko Tura Municipal Board (TMB) adita dolrang baksa bakrime Swaach Bharat Mission 2.0 ni ning·o Mass Cleaning Drive-ko ong·atangaha.
Rongtal an·talataniko dakna pringni 7 mangoni a·bachengaha jeon kam tikata man·gipa dolrang namen mitchigipa aro sowekgipa jabolrangko gisiko nange rongtalatangaha. Super market-ko rongtalatna Central Puja Committee, Nazing antiko A·chik A·song Environment Enthusiast Society (AAEES), Hawakhana-ko FKJGP, Chandmari-ko GSU, Ringrey-ko Tura Traders Union aro Araimile-ko ADE dolna tikataha.
Ia somoio jolo dingtang dingtang dokanrangko dakenggiparangba bakrimaniko on·aha. Rongtalatanio bakko ra·giparangna nanggipa bosturang jekai gloves, mask aro gipinrangko TMB suale on·angaha. Unbaksana, bang·a dokan dakgiparangna jabol galchaknagita tangsim aro tangsek rongni bucket-rangkoba sualangjolaha. Iako manderangna dingtang mancha mikrakaniko on·a, samtangtango jabolrangko galramramjachina aro rongtal an·tale dongchina didianiko on·a ong·ataha.
