North Garo Hills, District Institute of Education & Training (DIET) Resulbelpara, April 8-oni 11 tarikona a·jani LP school skigiparangna ‘Constructivism & Critical Pedagogy’ ni bidingo workshop-cum- orientation program-ko ong·atangaha.
Salbrini ia program-o a·jani sak 40 mang elementary school skigiparang bakko ra·angaha. Ia program-ko DIET ong·ataha aro professor-rangan resource person ong·e L.P school teacher rangna skie on·angaha.
Program-ni bakko skigiparangna school-o dakna nanggni aro namdapataniko ra·bana cholrangko u·iatangaha. Chasong gital ba 21 century-o jakkalna nanggipa changa sapanirang, Inquiry based learning, student centred classroom, skigipani daitoko ma·siani aro tarisamsona nangani bidingrangoba programo skiangaha. Unbaksana, bi·sarangko tal·bate ma·siani, uamangko an·tangtang skie ra·na didianiko ra·baani, somoini kri changa sapaniko jakkalani aro classroom-ko an·saoatani cholrangkoba skigiparangna talate on·angaha.
Program-o bakko ra·gipa L.P school skigiparangna topic rangko on·e presentation-ko dakataha. Bon·kamgipa salo bakko ra·anina gamchatgipa lekka pancharangkoba sualangjolaha.
