A·dok sorkarini 108 emergency medical service-ko private company-na on·angna chanchianiko Meghalaya EMRI Workers Union (MEMRIWU) dol raken jegalangaha.
Ru·uta salrangonin 108-o kam ka·giparang uamangni kamrangko regularise ka·china dabienggipako da·alonaba sorkarioniko aganchakanirangko man·kujaenganina suk ong·gijaniko MEMRIWU dol parakataha.
108 service-ko GVK-chi chalaigipa contract 2022 bilsio bon·atani ja·mano National Health Mission jako ra·e kamko ka·angskaaha. A·dok sorkari 108 service-ko chang·satai private company-na tender-rangko on·angna chanchianiko Health Minister Ampareen Lyngdoh-ni parakatgipako MEMRIWU dol jegalataha.
Ia antini gisepo sorkari mamingkoba aganchakjagenchimode 108 o kam ka·giparang rakbate jegalanirangko dakanggen ine parakataha. Uni gimin ia on·enggipa somoini bako 108 o kam ka·giparangni dabienggipako knachake uamangni kamrangko regularise ka·china MEMRIWU dol sorkariko mol·molangaha.
