Mijal salni bako Garo Hills Autonomous District Council (GHADC) office ni a·palo Sit In Demonstration ba asonge jingjengataniko NGO dolrang dakangaha.
Ia sit in demonstration ko Garo Hills ni adita dingtang dingtang NGO dolrang jekai Garo Students Union (GSU), A·chik Youth Welfare Organisation (AYWO), Federation of A·chik Freedom (FAF), Federation of Khasi Jaintia and Garo People (FKJGP), Tura Government College Students Union (TGCSU), aro Federation of Khasi Jaintia and Garo People Tura Government Cell (FKJGP TGC CELL) dakdilangaha.
Ia tom·aniona Garo Hills ni dingtang dingtang a·jarangni dilgiparang sokbaenba ku·monganiko mesokangaha.Ia jingjengataniko, NGO ni dilgiparang ming 5 dabianirangko chu·sokate on·china GHADC ko didiangaha. Uamangni dabianiarangara GHADC o dingtang electoral roll ko on·china, Garo Customary Law ko bimang ong·atna ta·rake kam ka·china, GHADC-ni ning·o tangka paisani niamko songna nanganiko janape Financial Rules ko ra·gatchina dabiangaha.
Una agreba GHADC o kam ka·giparangna nambate niam rangko tarie on·china GHADC o Service Rules a·bachengatna dabiangaha. Apsan dake GHADC o tangka paisa ni kamrango kakket ong·e kam ka·na man·agita aro pilakni nikna man·agita Public Accounts Committee (PAC) ko songchinaba didiangaha.
