South West Garo Hills Rerapara C&RD Block-ni ning·o donggipa Harikel English School-o World Malaria Day-ko maniangaha. Ia program-o Rerapara C&RD Block-ni Block Development Officer, A Ch. Momin mongsonggipa sokgipa ong·e bakko ra·angaha.
Ia program-o malaria, Japanese Encephalitis (JE), Tuberculosis (TB), Leprosy konchi sa·ani aro saksa sakgipinona batrikrikgipa sabisirangni bidingo dingtangmancha mikrakataniko on·angaha. Ia program-o skul bisarangna noksa salani aro quiz-rangko ong·atange, susaanio chegiparangna boksis-rangkoba on·angaha.
Ia program-o TB sabisiko gimaatna jotton ka·ani chu·sokgipa ong·anina TB-Free Village ba TB sabisioni jakgitel ong·gipa songni bimingko Dalupara aro Asnagre songrangna on·angaha.
Malaria sabisiko a·jao komiatna man·agita simsake dongna be·en ding·e sa·ani pilakon porikka ka·e nina aro dingtang mancha wachi karini somoio champenganiko dakna gita District Malaria Officer Dr. Lydia Marak aganangaha.
