Resubelpara jolo salantio re·rurana jakkalenggipa nangchongmotgipa ramarangko tarigija donchipe wachi kario a·bildekrara dakaniko, manderangni social media-rango mesokatanirang giproroenganiko sakantian niknagita man·enga. Indake ramarangko tarigija donchipanina manderang jolni MLA aro Deputy Speaker-ni kosako matnange agananirangkoba knanagita man·angaha.
Salantio re·ruraenggipa skul bi·sarang aro office-rangchi re·giparang ia re·togijagipa ramarangko re·na nangani a·selo namen neng·nikaniko man·enga jean jolni MLA ni songdongenggipa manderangna simsak nirokgijaniko aro a·dok sorkarini chu·sokatgijaniko mesokani ong·a ine Rongrong-ni MDC Rinaldo K. Sangma matnangataha.
Batanggimin election-ni somoirango wenanio Chief Minister an·tangan ia ramarangko re·e, rama gitalrangko tarie on·a ku·chakmanahaoba, 2018 bilsionin da·onaba changsaba taridape on·anirang dongkuja ine Sangma janapataha. Unbaksana bang·a Resu jolni ramarango a·kilokrara dakgenchimoba MLA ni jakkalgipa contractor-rang bretgipa aro a·kilokrango a·gitchakko alamila dapmangmange bilsiantio chongipa taridapanirangko daknagita AR/SR scheme-rangni tangkarangko bikote ra·rongenga ineba Sangma janapangaha.
Indakgipa neng·nikanirangko jolni manderang chagrongenganina, Resu ni MLA an·tangan ia ramarangko re·bae niechina didiatan baksana salantio hajalni hajal skul bi·siarang aro office re·giparangni neng·nikanirangko a·dok sorkari baksa nirokate ta·rakkale kamrangko ka·chinagitaba Sangma mol·molataha.
