South Garo Hills a·jani sima ari jolo bike aro Alto gari bolsako kanamgijagipa mongmarang chadrape nosto ka·angaha. Ia ong·a obosta da·al attamni 2 bajimangni somoio Baghmara-oni km 16 mang chelgipa Nilwagre aro Rasnagre songo ong·aha.
Ia a·sel ong·anio bike aro Alto gario gadoenggipa manderang buringona kate joknagita man·aha. A·selo ga·akgipa manderang Sibbari-oni Baghmara-ona re·angengmitingo mongmarangni rang·san sepangona toksan dake re·baaniko nike an·tangtangni bosturangko gale kate joknagita man·aha. Bangladesh-ni sima ariko batsote re·bagipa mongmarang bike aro Alto gariko ka·o nange ga·chepe nosto ka·an baksana Alto gariko rama apalchipakna sinpake don·angaha.
Sima ari jolrango mongmarang manderangni dongchakramrangona re·bae nokrangko nosto ka·anirang batrikrikenganiko nikna man·enga. Indake mongmarangni rangsan chadrapanirang West Garo Hills-ni Tura oni Dalu ramarango aro South Garo Hills-ni Baghmara-ni ramarango ong·batanirangko nikna man·enganian songre songgabatgiparangna namen kenbegnigipa ong·enga. Indake ong·engon Baghmara-ona re·gipa highway-rangko name nirok simsakgijani a·seloba songre songgabatgiparangna namen neng·nikanirangko ra·baenga.
