Rongjeng-ni adita NGO dolrang jekai GSU, APA, FKJGP, ACFI, ASWA, AOSW, GSMC, AAYF aro GSMC baksa bakrime Rongjeng United Govt. U.P. School ni sepango bonded aro chu dokanko kuliani bidingo changni chang dontongatchina ba apjitatchina u·iataniko dakmanahaoba da·ona kingkingba nirokatkujaenganina Deputy Commissioner (Excise) na chitti see janapataiaha.
Skul, hospital ba torom nokrangoni 200 metre mang chel·aosa chu dokanrangko dakna man·gen ine a·dok sorkarini dongimin niamo pangchake uamangni janapatanina re·anggipa April 23, 2024 tariko Excise department biapona nirikkianiko dakna re·bae chu dokan aro bonded-oni badita chel·ako toe nion 67 metre-san ong·aia ine u·ina man·angaha. Indake sorkari aro Supreme Court-ni dongimingita chel·ao ong·gijako ma·simangenchimoba ia chu dokanrangna maina licence-rangko on·kuenga ine NGO dolrang sing·doangan baksana bonded-ko aro chu dokanko chalaienggiparangna licence-rangko on·kuenganiara sorkarini dongimin niamko pe·ani ong·a ine janapataha.
Bonded aro chu dokanrangko dake cha·engani kosako uamang maming jegalaniko dakenga ong·ja, indiba an·tangtangni man·gnina niamrangko pe·e skulni sepangrango kulina on·aniara songsalna aro poraienggipa chatro chatrirangko namen nosto ka·nagipa kam ong·a ine janapataha.
Indake ong·engon iani bidingo changsatai Rongjeng United Govt. U.P. School-ni sepango dakenggipa chu dokan aro bonded-ko gipin biapona apjitatchina mol·molangan baksana chitti see u·iataiani sal 7 ni gisepo apjitna maming ja·kurangko de·jaode iani bidingo daito donggiparang uamangni licence-rangko ra·galchina didiangaha. Uni gisepon department-nigita iako nirokatjaode, jolni NGO, toromko dilenggiparang aro songdongenggiparang tom·aniko dake raka ja·kuko de·anggen ineba mikrakataniko on·angaha.
