June 27 tariko North Eastern Hill University (NEHU)-o research ka∙giparang aro skigiparang chonchongipa karkanarangko songsalo maikai a∙bachengatna skie on∙angna program-ko ong∙atangaha.
Ia program-o Deendayal Research Institute, Chitrakoot, ni saksa business ka∙gipa mande aro Social Worker jean 1978 oni Deendayal Research Institute o kamko ka∙enggipa, Vasant Pandit agan-skie on∙angaha. Ua saksa songsalo dingtanganiko ra∙bana gita 1998 bilsionin Chitrakoot jolo songdongenggipa manderangna kamrangko dangdike on∙gipa mande ong∙a. NEHU ni skigiparang aro researcher rang songsalo maikai manderang noktangtango chonchongipa karkanako a∙bachengna gita dakchakna man∙gen uko Pandit agan-talate on∙angaha.
Researcher rang songsalo manderangni nanganiko ma∙sigenchim ong∙oba uamangni gipin nangdapanirang dongkua aro uamangni nangdapanirangko chu∙sokatanian researcher rangni kam ong∙a, ia kamko chu∙sokatna gita manderang baksa namgipa bakrimani dongna nangchongmota ine ua aganangaha.
NEHU ni Vice-Chancellor, Prof. P S Shukla-ni, Pandit na mittelpilani kattarangko aganengon, uni agananio pangchake Social Worker rangni kamko ka∙anichi a∙doko songdongenggipa manderangna mikkangchi bang∙a dakchakniko ra∙bana gita man∙gen ine Shukla parakataha.
