Meghalaya a∙doko CUET Under Graduate (UG) porikkako May 15 tarikoni ong∙atna National Testing Agency (NTA) tik ka∙angaha. Ia porikkako damgittam centre rango chong∙motan Shillong, Tura aro Jowai-o ong∙atanggen.
Ia chang CUET porikkako hybrid mode-o ong·atna tik ka·aha jeon Computer Based Test (CBT) aro lekka kolomko jakkale porikkako seanikoba ong·atna NTA u·iataha. Lekkao senakgiparang ba offline porikkako May 15 oni May 18 tarikona ong·atanggen aro CBT porikkako May 21, 22 aro 24 tarikrango ong∙atskana NTA tik ka∙aha.
India a∙song gimiko CUET-UG porikkako lakh 13.48 mang chatro chatrirang dam 380 centre-rango seaniko dakanggen ine chanchisamsoanirang gnang. Meghalaya a∙doko offline mode-o seaniko dakanggen jeon Shillong songjinmao sak 8,535, Tura-o sak 5,618 aro Jowai-o sak 4,269 chatro chatrirangko ia bilsini CUET-UG porikkako seanggen.
