Wachi kari sokbaanichi a·doko china neng·nikanirang komiangan baksana salantio chiko wataniko namdapatna man·engaha ine PHE Minister Marcuise Marak parakataha. Da·ororo china neng·nikanirangko komiatna, dikdiksana ba ru·uta somoirangna nanggipa ja·kurangko de·e kamrangko ka·na nipiltaianiko dake chanchirimangaha ine Marak janapataha.
Uandake batanggimin antio mikkarang waanichi, a·doko songdongenggipa manderang ia ding·ani somoio chirangko chu·ongagita man·gijaoni adita naljokatani cholko man·aha. IMD rangni u·iatanigitade adita salrang watchange mikka waanirang dongkugen ineba Marak janapangaha.
Adita salrangna skang a·doko china namen neng·nikanirangko chagrongangaha jeon bang·a chiring chibisikrangni ran·krakaniko nikangna man·aha. China namen neng·nikaniko chagronganggipa biaprangara mongsongbate Garo Hills aro East Khasi Hills-o ong·aha ine Marak parakataha.
