Mongolbar salni bako Meghalaya a∙doko Ri-Bhoi a∙jani diltugipa song damsao bilsi sotsnina batgipa me∙apa saksa, bilsi chu∙ongkugijagipa me∙chik bi∙sako drae til∙ekanina POCSO Act-o pangchake badi ka∙ako man∙aha ine Ri-Bhoi thana ni Superintendent Giri Prasadh u∙iataha.
Me∙chik bi∙sa an∙tangni be∙eno saanirangko ma∙a-paana sombar attamo janapani ja∙mano uko mongolbar salo sannaniko dakna hospitalona rimangon til∙ekani chinrangko nike doctor rang u∙iataha ine pulisrang parakataha. Ua bi∙sako songni sanchakram biapo nambata sanna-bannanirangko dakangkuenga ine u∙iatangaha.
Me∙chik bi∙sako sing∙sandianio dosi dakgipa mande uamangni ba∙rimaoni mandean ong∙a ine ma∙sina gita man∙aha aro bi∙sani ma∙a-paa bakan sepangjolni thana-ona re∙ange dosi dakgipa mandeni kosako badi ka∙angaha. Uko POCSO Act-o pangchake dosi ine parakatenba patoko donataha ine koborko man∙soaha.
