Gitcham DGP Lajja Ram Bishnoi-ni kosako ong∙gija garini number plate-ko tape jakkalanio gitcham AIG GK Iangrai-ni mokordoma ka∙aniko, LR Bishnoi-ni retire ong∙ani ja·manba am·sandianirangko dontongatjawa ine a∙dokni CM Conrad K. Sangma aganangaha. Iani gisepon sorkari niamgita kam ka∙anirango maming champengani dongjawa aro am∙sandianirangko dake kakketgipa raiko on∙chinagita uamangnan pakwataha ineba Sangma aganangaha.
Uko mokordoma ka∙aniara a∙jak sotanisa ong∙a ine Bishnoi-ni dontongatchina agananina, dongimin niamrangko ja·rike kamrangko ka∙angenga aro niamo pangchake kakketgipa raiko on∙china ine Sangma aganangskaaha. Ia mokordoma ka∙aniara pulis department-ni gisepo meligrikgijaniko mesokani ong∙ama ine kobor ra·timgiparangni sing·anina, uamang an·tangtangnigita dingtangmancha nanggrikanio department-ni gisepo maming meligrikgijani katta aro bak dongja ine Sangma agandapangaha.
