Da·al attamni bako West Garo Hills a·jani Don Bosco Centre for Learning, Tura-o Catholic toromo bebe ra·giparang aro toromni dilgiparang A·chik a·songo Salesians rangni dangdike on·ani bilsi 90 gapaniko gisik ra·na tom·bimonganiko dake maniangaha.
Ia tom·bimonganiko attam 6 baji mango a·bachengaha jeon Salesians of Don Bosco (SDB) Guwahati Province ni Provincial Fr. Januarius Sangma, Garo Hills ni adita Father, Sister rang aro dingtang dingtang congregation-rangni toromo dilgiparang re·bae bakrimeaha. Apsan dake adita dingtang dingtang biaprangoni chadamberangba re·bae bakko ra·angtokaha.
Tom·bimongani bako Garo Hills ona re·bae A·chik a·songna aro manderangna kamko ka·e dangdike on·anggipa Salesian Father rangko gisik ra·aniko dakangaha. Ia somoio Garo Hills ona 1923 bilsio re·bachenggipa Fr. Archimedes Pianazzi aro gipin dilgiparangkoba gisik ra·angaha. Unbaksana Missionaries rangko gisik ra·e segimin lekka rangkoba oprakanirangko dakangaha. Ia lekkarangara Fr. Dr. Jogesh B. Sangma ni segimin “Among the Garos” aro “Memories of Bishop Orestes Marengo” Volume I aro II ong·a.
Bon·kame Salesian rangni A·chik a·songo donge A·chikrangna kam ka·angani bilsi 90 ong·aniko an·saobee git ring·mesokanirangkoba dakangaha.
