NGH A·dokgre-o MGNREGS-ni ning·o kam ka·mangimin sal ritchasani hajirarangko ru·uta somoirangna on·chipgija dongenganina tangka paisarangko chamatchina A·dokgre Unit ni A·chik Holistic Awakening Movement (AHAM) dol jolni manderang baksa bakrime skotong Minister Conrad Sangma-na chitti see u·iatangaha.
Ian a·songni jagitelani bilsi 56 gipako maniani somoio National Rural Guaranteed Act 2005 ni ning·o songadamni manderangna salantio kam ka·e chana man·agita kamrangko tikate sal ritchasana komigija hajirarangko on·na ma·mong sorkarini on·gimin ong·a ine janapataha. Indake ong·genchimoba A·dokgre C&RD block-ni ning·o bang·bata Village Employment Council (VEC) aro job card ka·enggiparang financial year ni ja·manba man·gija dongenga aro bang·a songrangan sal 60 oni 65 rangnikosa man·kuenga jean MGNREGS-ni dongimin niamko pe·ani ong·a ineba AHAM dol janapangaha.
Songadamrango songdongenggipa manderangni neng·nikanirangko olgrokatnagita iani bidingo ta·raken nirokatchina aro nanggipa ja·kurangko de·china skotong Minister-ko AHAM dol mol·molataha.
