Garo Hills-o namgipa aro niksenggipa bida pakwatchakram ge·saba dongkujanina Central Institute of Technology (CIT) ko ra·bae on·china A·chik Conscious Holistically Integrated Krima (ACHIK) dolrang Education Minister Rakkam Sangma-na chitti sedoangaha.
Meghalaya a∙dok jakgitel ong∙aoni bilsi 50 na batpilahaoba, Garo Hills-o ge∙samangba namgipa aro niksenggipa bida pakwatchakram da∙onakingkingba dongkuja aro central-ni namnamgipa institute-rang jekai NEHU, NIFT aro EFLU-rang Shillong songjinmaosan dongaia ine janapataha. Apsan daken Tura-o je NEHU campus dongpagipaba chu·gimik bilrangko jakkale chalaina man·ja aro department-rang namen komia ineba janapataha.
Garo Hills-ona State University ko ra·bagenchimoba uko a∙bachengatna somoirang nangkugen Garo Hills-ni chadamberang central university-o napna chol man·paoba maming specialise course-ko poraina man∙pajae poraia matchotani ja·man kam sandiani somoio neng∙nikanirangko chagrongronga ine janapangaha. Indake ong·engon tangka paisanigita neng·nikani a·sel nambata gadango poraina chol ong·jae bang·a A·chik chadamberang ja·manchakrongenga ineba janapangaha.
Ia janapgimin obostarangko nigrikate Garo Hills-ni pilak chadamberangni chu·gimik tang·doanina chasong gitalo janggi tangani somoio technological aro vocational training-ko on∙a man∙agita Central Institute of Technology-ko ra∙bae on∙china ACHIK dol dabiangaha. Ia Central Institute of Technology-ko ra·baanichi A∙chik chadamberang kamrangko am∙na nengragen aro A∙chik a∙songo advanced engineering-ko skie ra·na chol ong·anggen ine janapangaha. CIT ko ra·bae gitcham course-rangko ong∙gija gital course rang jekai Computer Science Engineering, Petroleum Engineering, Chemical Engineering, Cyber Security Enngineering, Instrumentation Engineering, Mining Engineering, Aerospace Engineering, Aeronautical Engineering rangko ra·bachina dabiangaha.
Kosako janapgimin engineering course-rang mikkangchi chatro chatrirangna namgipa skie ra·ani chol ong·an baksana gipin CIT rangko niatgenchimode ge 6 ba ge 7 branch-o specialise course-ko on·a aro Graduation-oni Ph.D-ona kingking donga. Indakgipa chasong gitalni course-rangko ja·rikanichisa chadamberang chasongni kri kamrangko man·a amgen maina gitcham course-rangko Polytechnic aro ITI rangan skie on·enga ine aganangaha.
Una agreba a∙dok sorkari CIT ko a∙bachengataniko namnikgenchimode Ministry of Education baksa nanggipa kamrangni bidingo golpogrike a·bachengatchina ACHIK dolrang Education Minister-ko didiangaha.
