Chief Minister Conrad Sangma, election-ni result ni bidingo jinma tom·aniko dake chanchirimangani ja·mano Ia MP election-o ama cha·rikgenchimoba MDA chu∙gimik bilsi 5 ko matchotate sorkariko rikanggen ine parakangaha. Sirikna nangani bidingo aganengon, a·selrangko janape result ni bidingo adita chanchirimanirangko dakangkugen ine Sangma u·iataha. MDA o bakrimgipa UDP aro BJP dol baksaba agangolporimaniko dakangaha ine Sangma agandapangaha.
Batanggipa 2023 o manderangni nangnikani aro skaniosa ia sorkariko rikaha, apsandake ia Lok Sabha Election oba manderang an·tangtangni nangnikaniko mikkango donaha ine Sangma parakangaha. MDA sorkani kam aro bilko jakkalsreatani bidingo sing·on, uarangko sing·sandianiko dakon maming sakkiko man·jaha aro maming mikkang nitea grisa ka·angaha ine Sangma aganangaha. Indake ong·genchimoba MDA sorkariko bilsi bongana matchote rikanggen ine Sangma agandapangaha.
