A·chik Holistic Awakening Movement (AHAM) Bajengdoba Unit, North Garo hills a·jani skotong Resubelpara-ona re·ange, Additional Deputy Commissioner aro Additional District School Inspector rangko gronge Bajengdoba Block-ni ning·o donggipa skulrangni nanganirangna lekkarangko on·angaha.
Batanggimin antirangna skang Bajengdoba Block-ni ning·o donggipa songrangni dingtang dingtang L.P aro U.P skul nokrang aro poraigipa chatro chatrirangni neng·nikanirangko sing·sandie kam ka·engon, Ronjalenggre Govt. L.P skul aro Kimdegre SSA U.P skulni skigiparang aro skulni committee-rang baksa songni nokni manderangba uamangni neng·nikanirangko talate on·angaha.
Ia ong·a obostarangni bidingo DI office-ona re·ange sing·sandiko dakon, Ronjalenggre Govt L.P skulni namdapatna nanganiko, matchotgimin aro gital skul nokrangni photo-rangko mesokataha ine AHAM dolrang u·iatangaha. Indake ong·genchimoba Ronjalenggre Govt L.P skulni headmaster-ni talatanigitade 2023 bilsion skulko namdapatani kamrangna sanction ka·genchimoba, da·alonaba tarie on·kuja inesa janapangskaaha. Unbaksana Headmaster-ni aganagitan songni manderangba sakkiko on·aha aro biapona re·ange nirikkianio ua gital skul nokko nikbajaha ine u·ina man·aha.
DI office-oni mesokatanigitade Rongjalenggre Govt L.P (code no. 17080115901) skul nokko namdapatani 2023 bislini January 16 tarikon matchotmanaha aro uamangni noksarangko mesokataniko nikbaaha ine parakataha.
Completion certificate-o Rongjalenggre Headmasterni soi ka·ani aro skulni seal stamp-rangko on·ahani gimin Headmaster-na phone ka·e sing·sandianiko dakon, tol·gipa soi aro seal/stamp-rangsa ine u·ina man·aha. Ia ong·gipa obostani gimin aganengon darang contractor-naba da·o dipet indake skatang soi ka·e on·kuja ine jegalani kattarangkoba aganatanikoba knana man·angaha.
Indake ong·engon Rongjalenggre Govt L.P skul nokko man·gipa Contractor Bruselish C. Marak, skulko namdapatna chamgimin tangkako jakkalgija tangkarangko jakkalsrete lekka aro photo-rangko on·e cha·bokahama ma gipinrangsa uni bimungo cha·bokahama ine chnachipaniba dongaha. Iani bidingo name tale ma·sinagita Additional DC ta·raken biapona re·ange sing·sandianiko dakangna Bajengdoba Block-ni BDO-ko watatna ku·rachakangaha.
Mikkangchi indakgipa cha·bokani kamrang soktaijachina a·jani mongsonggipa dilgiparang sorkarini chamatgimin rika cho·anirangko biapona re·bae nirokegija man·a nanggipa chu·mik tangkarangko on·jachina Bajengdoba Unit-ni AHAM dolrang mol·molangaha.
A·chik a·songni aro Meghalaya a·dokni development scheme-rangko indake cha·boke cha·giparangko sorkari raka sastiko on·a nanga aro nie dongaiode mikkangchiba cha·bokanirangko bang·en nikangkugen ine AHAM dolrang aganangaha. Una agreba indakgipa kamrangko ka·angkugenchimode Garo Hills maming dakeba tang·dona man·jawa ine pilak songko nokko dilgiparang, songsalna dangdike on·giparang aro jolo rika cho·anirangko nigrike nambata gadango kam ka·na ja·ku de·angna nanggen ineba AHAM dolrang didiangaha.
