Meghalaya sorkari Hynniewtrep National Liberation Council (HNLC) dolrangko pilak namgija kamrangko wate tom·tome dongani bidingo golporimna ma·mongo gital sorkariko riktaiani ja·mano Deputy Chief Minister, Prestone Tynsong, HNLC dolko re·bae a·dok aro ma·mong sorkari baksa chanchirimaniko dakchina mol·molataha. Unbaksana tom·tomaniko ra·bana golpoanirangko dakna darangkon rim·chaksoa aro do·garangko kulie donsoenga ine Tynsong parakataha.
Re·anggimin somoio HNLC-oni rim·a man·giminrangni bidingo aganengon, namgija kamko ka·giparangko niam retio pangchake ja∙ku de∙angna aro HNLC-kosan ong·aigija darangnan apsandaken sorkari kamrangko ka·anggen ine Tynsong parakangaha. Dingtangmancha niamni a·palo ga·akgipa kamrangkoba ka·jachina aro bon·kamaona kingking tom·tomaniko ra·bana golporimaniko dakangkuna ine Tynsong agandapangaha.
