Meghalaya State Education Commission, Chairperson Prof. SM Sungoh-ni dilanichi Member Secretary, Education Department ni Secretary, Personnel aro PR (A) Ambrose Marak, Adviser-rang Dr. David Syeimlieh aro Tony Travert Ch. Marak, East Garo Hills a·jani DC Vibhor Aggarwal, unbaksana bida pakwatramrangni skotong dilgiparang East Garo Hills, Williamnagar, Loyola College-o poraiani gadangko namdapatna tom·e chanchirimangaha.
Commission-ni Chairperson Prof. Sungoh, State Education Commission (SEC) ni miksonganirangko talatange, a·doko poraia skiani a·bao National Education Policy (NEP) 2020 ko ra·gatanichi dingtangatani kamrangko ka·angenga ine tom·anio bakko ra·giparangna aganangaha. Skia poraianio neng·nikanirangko SEC niroke, a·dok sorkari poraiani gadango pilak nangani aro neng·nikanirangko namdapatna kamko ka·enga ineba Prof. Sungoh aganangaha.
A·jani DC Vibhor Aggarwal ia tom·anio aganengon, bida nokrangko dilenggiparangni ku·pattiani aro agantalatanirang a·doko poraiani gadangko tang·doatna namen dakchakbeani ong·gen ine aganangaha. Ua dingtangmancha a·jao Lower Primary aro Upper Primary skulrango neng·nikanirangkoba parakangjolaha.
Ia tom·aniko ong·atani miksonganiara SEC-ni dingtangmancha manderang baksa agangolpogrike a·dokni poraini gadangni kakket a·sel ba obostako u·i masie namdapatna man·agita ja·ku de·ani ong·a. Ia tom·aniona a·jani Education Department officer-rang aro bang·a bida nokrangni dilgiparang bakko ra·e pilak nangnikani aro neng·nikani bidingrango agangolporimangaha.
