Mijal salni bako Tura Stephen Memorial Higher Secondary School-o, Domestic Worker ba gipin noko kam ka·giparangna Financial Literacy Camp-ko Tura Urban Co-operative Bank-nigita ong·atangaha. Ia programme-o Tura Urban Co-operative Bank-ni CEO Nandey A. Sangma mongsonggipa sokgipa ong·e dingtangmancha tangka paisarangko donani gimin aro sakgipinni noko kamrangko ka·e cha·genchimoba je man·gimin tangkarangoniko bang·gijako rakkie chimonge mikkangchi janggi tanganirangko tang·doatna man·a amaniko skie on·angaha. Unbaksana sorkarini scheme-rang jekai PMJJBY aro PMSB-rangara kam ka·e cha·enggiparangni scheme ong·ani gimin je Bank-onikoba Account donggenchimode loan-rangko ra·na man·ani bidingoba Sangma talatangaha.
Program-ona sokbagiparangoni saksa aganengon, Loan-rangko ra·e mingsa miksonganiko done bading chiwalanirangko dake cha·na nanga, name jakkalna nanga aro loan-rangko ra·ani ja·mano gampilgija donchipna man·ja ine Tura Urban Co-operative Bank-ni DO Tengsrang G. Momin aganangaha.
Una agreba battanggimin bilsirango domestic worker-rangko re·dilanio banga nengnikanirangko man·genchimoba ia bilsioni bang·a kamrangko chu·sokate on·angna man·aha ine Domestic Worker-ko dilenggipa Jansira N. Marak aganangskaaha.
Ia Domestic Worker-ko 2015 bilsioni a·bachengate sak bonga dilgiparangko seoke kangal cholgri ba ma·gri paagri ong·e janggi tangenggipa manderangko tang·doatna raken kamrangko ka·angaha aro iani bidingo sorkarioniko maming dakchakaniko man·jagenchimoba adita kamrangko chu·sokate on·a man·anganikoba Marak aganangaha .
