Ia bilsini MBOSE HSSLC porikkao Don Bosco College Higher Secondary Section, Tura-o Science stream-ni porikkako seanio Arghadeep Ghosh-ni answer script-ko nipiltaiani ja·man ua Top 10 ni ning·o 9 gipa gadango chu·sokanina da·al salo mande ra·aniko dakangaha.
Arghadeep saksa Science stream-o poraie HSSLC porikkao a∙dokni top 10 gadango pass ka·na ka·dongsoani gnangchim jeon batanggimin jao MBOSE-ni result-ko parakatanio uni ka·dongsoagita ong·jaha ine u·ina man·aha. Indakgipa obosta ong∙anina suk ong·jae ua dingtangmancha MBOSE-oniko uni segimin lekkarangni copy-ko bi·ate skigiparang aro ma·apaarang baksa namedake nipiltaie uni segimin lekkarangko re-evaluate ba nipiltaichina didiataha.
Indake chang·satai uni segimin lekkarangko nipiltaianio 7 mark-rangko man·dapanichi a·dokni Top 10 list-o 9 gipa gadangona sokdoangaha. Man·dapgimin 7 mark-rangko on·dapanichi English-o 80 aro Computer Science-o 89 mark-rangko man·e chu·gimik 456 mark-ko man·aha jeon nipiltaiatna skang ua 449 mark-kosan man·aha ine parakataha.
