EGH Nengkra-ni NGO-rang chong·motan GSU, GSMC, FKJGP, AAYF aro APA dolrang bakrime Williamnagar Women Police Station-ni Officer Inchagre Krusitha G. Momin aro Rongjeng Police Station-ni Sub-Inspector Jansitha S. Marak-ni kosako kamtangko tik ong·e ka·janina matnangate Williamnagar-ni SP na chittiko sedoataha.
NGO dolrangni matnangataniara, batanggimin salo Nengkra bolsalgittimni bilsi 14 ong·gipa aro Nengkra Watregittimni bilsi 15 ong·gipa me·chik bi·sa sakgniko kragija dakanio a·sel ong·a bakan medical test ra·gija donanina sing·doangaha. Ia a·sel obostao jak donggiparangara Williamnagar Samgonggre-ni Aman T. Sangma, Rongbinggre-ni Grindas R. Sangma aro Ringthonat N. Sangma baksana Balsrigittim-ni Bahet G. Momin ong·a ine janapataha.
Iani bidingo am·sandianirangko dakchina aro kakket bichalko ra·bae on·china June 23, 2024 tariko Williamnagar Women PS-o mokordomako ka·angaha. Mokordoma ka·ahanina am·sandianiko dakna a·selo ga·akgipa me·chik bi·sarangni ma·apaarangna be·en bimangko porikka ra·aha ine tol·e donchipaha ine NGO dolrang janapataha. Indake ong·engani gisepon June 24 tariko Rongjeng Women PS-ni Sub-Inspector Jansitha Marak, a·selo ga·akgipa bi·sarangni ma·apaako mokordoma ka·giminko ra·galchina draatan baksana me·chik bi·sa sakgniko salgimik cha·a ringa gri donenba, me·chik bi·sarangoba dosi donga aro ja·mano uamangnan namjawa ine kema ka·grike donchina aganaha ineba janapataha.
Indake dolgnikon kema birgrikate namate donani ja·mano a·selo ga·akgipa bi·sarangni ma·apaarang medical test ka·kujani bidingo u·ina man·aha aro June 25 tarikosa medical test-na okamako man·taiaha ine parakataha. Iani a·selo me·chik bi·sarangko 24 tariko maina medical test ra·jaha aro maina mokordoma ka·giminko ra·galchina draataha ine NGO dolrang sing·doangaha. Unbaksana dosi donggipa sak briko POCSO Act-oniko jokatna jotton ka·ahachima ma iani bidingo jako ra·e kamko ka·na kenahama ineba sing·doataha.
Medical test-ko ka·na ru·utatanina Krusitha Momin aro mokordomako ra·galchina draatani bidingo Jansitha Marak-ni kosako raka ja·kurangko de·e sastiko on·china NGO dolrang didiangaha. Indake dakanichi mikkangchi apsangipa a·selrangko chagrongaoniko champengnagita man·gen ine uamang chittio janapataha.
