Da∙ororo facebook, whatsapp ba gipin social media-rango kragija dake taridape aro sel·tagija kattarangko jakkale comment ka∙e mandeko ong∙siatna aro kratchaatna jotton ka∙gipa manderangko Human Rights and Anti-Corruption Youth Power of India (HR&ACYPI) raka sinjetaniko on∙agita tik ka∙angaha.
Indakgipa kamrangko ka∙anichi saksanasan kratchaaniko ra∙baani ong·aigija, ku∙watogijagipa kattarangchi comment ka∙arangko nikenggipa A∙chik songsalko dilgipa sakantinan kratchaaniko ra∙baa ine HR&ACYPI-ni dilgiparang aganangaha. Da∙ororo Garo Hills-o me∙chikrangko social media-gita kragija kattarangko jakkale ba uamangni video-ba photorangko taridape kratchaatna jotton ka∙giparang mongsongbate Fake account kuligiparang ong∙a ineba aganangaha.
Iani gisepon HR&ACYPI, Fake account kulie indakgipa kamrangko ka∙giparangni kosakoba am∙sandianiko dakna nanga kamrangko ka∙enga ineba uamang parakataha. Unbaksana social media-o je manderangan indakgipa kamrangko ka∙a uamangko rim∙e on∙a man∙genchimode ua mandena tangka 5,000 boksis ko on∙agitaba tik ka∙angaha. Indakgipa kamrangko ka∙gipani kosako Police Department-ko am∙sandianiko dake nanga ja∙kurangko de∙chinaba HR&ACYPI didiangjolaha.
