Tura-Paikan NH 217 gital rama tarienggipao chu·ongagita retaining wall-rangko name kajaengani a·selo a·arang ruronganichi songdongenggipa manderangna aro re·ruragiparangna neng·nikaniko on·enga ine Duragre-ni saksa Jaasan R. Marak koborna parakataha. A·arangni nangana batpile ru·ronganichi sepang jolo donggipa nok te·sana kenbegnigipa ong·enga aro je somoioba be·wakange janggirangko gimaatnaba gnang ine ua janapataha.
Ia a·arangna National Highway Authority tangkarangko on·manahaoba, mikka waani a·selo mittam a·arangba rurongdapangaha. Iarangko chagrongna nange rusiatako man·giparangna gisikni aro tangka paisanigitaba namen neng·nikaniko on·enga ine Marak aganangaha.
Mikkangchi apsandakgipa obostarangko chagrongna nangjanagita ia ramako tarienggipa company aro gipin daito donggiparangko retaining wall-rangko name gatdochina pilak songdonggipa manderangni palo Marak didiataha. Iasan ong·aigija ia project-ko company-ni kam ka·anirangko nipilange raka ja·kurangko de·na nanga ine ua aganaha. Unbaksana manderangni gimagimin a·arangna tangka paisarangko on·dapchinaba Marak janapatjolaha.
