All Khasi Hills A’Chik Federation (AKHAF) dolrang reservation policy-ko chengoni ja·rikbaengagita dakangkuchina, ba ong·jaode Khasi Hills aro Jaintia Hills-o songdongenggipa A·chikrangna kamrango aro poraiani gadangrango dingtangmancha a·kange uamangnaba dingtang dake ra·bae on·skachina expert committee-na chitti see janapataha.
Reservatioin policy-ni percentage-rangko sakantini namgnina ja·rikna nanga ine AKHAF-ni President Clivestar Ch. Marak aganangaha. Expert committee, policy-ko dingtangatna chanchia ong·ode general category-oniko 20 percent aro gipin tribal-rangniko 12 percent dake komiate Khasi-Jaintia na 48 percent-ona bariatskachina Marak aganangaha.
Indake ong·genchimoba, ia 48 percent chamatgipako Khasi aro Jaintia Hills-rango songdongenggipa A·chikrangnaba on·na nanggen ine Marak dabiatskaaha. Ri-Bhoi, West aro South West Khasi Hills-rango songdonggipa A·chikrang aditarang gnang. Uni gisepon Khasi-Jaintia Hills-rango songdongenggipa A·chikrang da·onaba pilak janggi tangani gadang, poraia skiani aro bang·a bakrangon ja·manchakuenga ineba Marak janapataha.
