North Garo Hills-ni Dainadubi Circle Youth Organisation (DCYO) aro A∙chik Indigeneous Justice Initiative Forum (AIJIF) dolrang aspan bakrime Dainadubi SBI ATM-ko chipe donenganina aro Bank-o kam ka·giparang chu∙ongjaenganina nanga ja∙kurangko de∙e kamko ka∙chinagita Dainadubi State Bank of India-ni Branch Manager-na chitti see didiataha.
Dainadubi branch-ni SBI ATM ja gittam mangnigita kam ka·jani a∙selo songdongenggipa manderangna salantio tangkarangko bikotna namen neng·nikaniko man∙enganina aro mongsongbate bilsi dal·gipa manderangna neng·nikaniko on∙enga ine janapataha. Aspandaken Dainadubi SBI-o kam ka·giparang chu∙ongjaengani a∙selo sakprakni kamnan ru∙utbee sengna nange bank-oniko tangka paisa bikotanio ro∙e ritdingo chadengna nangao ga∙ake manderang neng·nikanirangko chagrongenga ineba uamang janapataha.
Indake ong·engon ia pilak neng·nikarangoni naljokna man∙agita, Dainadubi SBI ATM-ko kulie on∙pilchina aro bank-ni kamrangko ka∙anio ta·rakatna kam ka·giparangko chu∙ongagita rakkichina DCYO aro AIJIF dolrang Branch Manager-ko mol∙molangaha.
