Garo Hills-o C&RD block-rango NREGA-ni kamko ka·na daito donge sualenggiparang songni manderangna chamatenggipa tangkarangoniko 50 per cent kattirikenganina Tura-ni MDC matnangataha. Ia dakgipa kamrang Garo Hills-ni bang·bata block-rango ong·enga ine MDC aganangaha.
NREGA ko sualenggiparangni agananigitade, chamatgimin ia tangkarangko political dilgiparangna aro adita official-rangna on·a nangani gimin kattina nangenga ine parakangskaaha. Iani a·selo songni manderang somoigita kamrangko matchotna man·jaenga ine Marak aganangaha.
Indake tangka paisarangko kattia man·gipa songni manderangko Marak uona re·bae janapechina didiataha. Ia kragija kamrangni bidingo ua sualenggiparangni kosako badi ka·naba ku·mongataha aro Chief Minister Office, unbaksana Deputy Commissioner–onaba sokatna aganangaha.
