Da·al salni bako College of Community Science, Central Agricultural University (Imphal), Tura-o World Youth Skills Day-ko MTTC aro VTC hall-o maniangaha. Ia bilsio World Youth Skills Day-o, “Youth Skills for Peace and Development” katta bichongo pangchake maniangaha. Ia salko United Nations General Assembly-ni 2014 bilsio July 15 tariko gisik ra·na tik ka·gimin ong·a jeon chadamberangna changa sapaniko skie on·e uamangni gamchatgipa dangdike on·ani, tom·tomaniko rakkie aro baikamgipa silroro namroroaniko ra·bana miksongani ong·a.
Program-ko pring 10:30 bajioni a·bachengataha jeon dingtang dingtang gadangni sokbagiparang bol bi·sana chi rue tom·aniko a·bachengataha. Program-ni bako Dr. Punyakishore Maibam rimchaksoani kattarangko aganangaha. Apsan daken College of Community Science CAU (I), Tura-ni Dean Dr. Jyoti V. Vastrad, chadamberangni changa sapaniko skie ra·ani mongsongbate ge·a gamani gamchatani bidingo aganangaha. Unbaksana ia chasongo chadamberangni gisepo so·sojengjeng ong·ani, poraia skiani a·bao nosto ong·ani, internet-ko dugapile jakkalani aro tangka paisa man·anio apsan ong·gija neng·nikanirangko chagrongani bidingo aganangaha. Indake ong·engon daito ra·gipa manderang tom·tomgipa dakbewalko skie on·an baksana mikkangchi baikamgipa silroro namroroaniko ra·baani bidingo didina nanganikoba Dr. Vastrad aganangaha.
Dr. Priyadarshini Mohapatra sokbagipa manderangna “Plant propagation and green house management of fruits and vegetables” jean bite aro mesu ge·anirangko bang·batatna ba jeldapatani cholrangni bidingo nambee agantalate on·angaha. Una agreba Dr. Rocky Thokchom “Skill development in nursery management” jean mesu samjakrangni bichilrangko jawaianiko skie ra·ani bidingo agangolpogrikaniko dakangskaaha. Bon·kame Dr. Narmada Hidangmayum program-o bakko ra·gipa aro pilak jako donge program-ko chu·sokanina mittelpilani kattarangko aganangskaaha.
