Mijal salni bako EGH Mangsang bajaro kajina ra·ani bidingo bading chiwalgiparang aro bajar committee-rangni gisepo nanggrikani a∙selo doka sataona sokangpilaha ine koborna parakataha.
Mangsang songni manderangni u·iatanigitade, ua bajaroniko kajina ra·gipa gitcham committee-rangna dongimin somoi bon·ahani gisepon gital bajar committee-ko seoktaina GHADC-ni ra·chakaniko man·agita watataniko da·onaba ra·chakuja ine parakataha. Indake GHADC-oni maming ra·chakani koborrang dongkujani gisepon Darugre-ni MDC Henendro R. Sangma songni manderangna u·iatgija chanchirime tik ka·enba an·tangni manderangko seoke manderangna parakataha ine u·iatangaha.
Ia obostarang ong·engon MDC-ni seokako man·gipa manderang mijalo Mangsang bajaroniko kajina gilanina Mangsang songni manderang jinma dokgrimna a·bachengaha ine parakataha. Dokgrimako man·gipa manderang thana-ona katnape joknagita man·aha ineba u·iataha.
Indake songni manderang Darugre MDC-ni niamni a·palo kamrangko ka·aniko jegalatan baksana mikkangchi bajaroniko kajina ra·angkuode dal·a golmal ong·aona sokanggen aro iani bidingo raka ja·kurangko de·anggen ineba parakataha.
