ACHIK Krima Council H.Q. Tura-ni Vice-President Greneth M. Sangma, SGH a·jarango Jal Jeevan Mission (JJM) ni kamrangko tik ong·e ka·jaenganina bakrime am·sandianirangko dakna a·jani DC Shivansh Awasthi-na chitti sedoataha. Sangma-ni chitti sedoe bakrime am·sandina janapatani miksonganiara, bang·a changon JJM-ni kamrangko ka·gija matchotani lekka pancharangko sakkina mesoke biapmanchaona re·ange nieode kamrangko ka·gija galchipengani bidingo ong·a.
Indake SGH a·jao bang·a JJM-ni project-rangko kam ka·anirango tik ong·jaenganina, department-ni officialrang, police, NGO-rang, Nokmarang, JJM-ni Village Committee member-rang aro koborko parakatgiparang baksa bakrime nambate am·sandianiko dakna ACHIK dolni palo Sangma didiataha. Una agreba iani bidingo am·sandianiko dakna sal ba tarikko tik ka·e uamangna u·iatpilchinaba Sangma a·jani DC-ko mol·molataha.
