Bangladesh a∙songo kamna rimnapna reservation-ni bidingo chatro chatrirangni jingjengatani a·selo so·sojengjeng ong·aniko niknagita man·enga. Indake so∙sojengjeng ong∙engani gisepon Bangladesh-o poraienggipa Meghalaya a·dokni sak 67 chatro chatrirang noktangona tom∙tome sokbapilna man·aha ine u∙iatangaha.
July 18, Bristibar attamo koborko parakatanigitade, India a∙songoni sak 198 chatro chatrirang, sak 4 tourist, chu∙gimik sak 202 manderangko Bangladesh a∙songoniko rimongkatna man∙aha. Chatro chatrirangko salgipa bus mijal attamni 6:45 baji mangni somoio ICP Dawki-oni re∙chakatbaaha. Ia so∙sojengjeng ong∙anirang July 15 tarikoni a∙bachengbaaha jeon da∙o dipet sak 32 manderang janggirangko galaona sokaha ine u∙ina man∙aha.
So·sojengjeng ong·ani mongsonggipa a·selara, 1971 bilsio Bangladesh a·songko jakgitel ong·atna dakgrikgipa manderangni ma·drang maharirangna sorkarini kamrango 30% ko a·kange donaniko ra∙galchina chatro chatrirang dabianiko dakangenga.
