EGH, Rongjeng Dambo block-ni ning·o donggipa Nongchram U.P Deficit skulo, Hindi-ko skigipani kamna kragija mikkang nitee rimnapanina AHAM Rongjeng regional unit a·dok sorkarini Directorate of School Education and Literacy (DSEL) ni Director Swapnil Tembe-na lekka sedoataha. AHAM dolrangni am·sandie nion School Managing Committee (SMC), Hindi-ko skigipani kamna nambatgipa manderang donggenchimoba skina sapgijagipa mandekosa kamo rimnapaha ine uamang parakataha.
Ia skulo rakkigipa Hindi skigipako SDSEO aro School Managing Committee-ni ra·chakaniara mikkang nitea gnangsa dakaha jeon advertisement-o am·anigita nanggipa MTET/CTET certificate-rangba dongja ine u·ina man·aha. Kamo rimnapako man·gipa skigipa election ID-nigita bilsi 41 mang ong·aha aro ian uko kamna seoka man·a kragijani sakkikoba on·a. School Managing Committee, dorgastoko ra·chakani somoio man·a kragipa manderangko nanggipa lekka pancharang dongja ba uandake bang·a cholrangchi ra·chakna jechakaha ine AHAM dol parakataha.
Ia skigipani kosako am·sandianio, uni skul gitchamo ka·engmitingo chong·motan Rongdu Dabit SSA skuloba class-rangko tik ong·e ra·jani gimin bang·a changon uko mikrakataniko dakaha ine AHAM dol janapataha. Changni chang SMC mikrakataniko dakatahaoba, ua class-rangko tik ong·e ra·jaha ine AHAM dolrang parakaha. Ia ong·enggipa obostarangko nigrike Nongchram Deficit U.P skulo Hindi skigipako ra·galchina, gitaldake kamna rimnaptaichina aro chu·ongagita bida budi donggiparangna apsan cholko on·china DSEL-ni Director Swapnil Tembe-ko mol·molataha.
