20 July, Sukrobar salo Cabinet tom∙anio Industrial Investment Policy 2024-ni ning∙o North Garo Hills Mendipathar-o Varun Beverages Limited-ni nirokanio Pepsi aro dingtang dingtang ringani bosturangko tarichakani karkanako riknagita tangka gong crore 200-ko chamatna ra∙chakangaha. Unbaksana Food Pulp and Fruit Juice Company-ko riknagitaba tangka gong crore 100-ko chamatjolangaha. Una agreba a∙doko anarosoniko juice tarianikoba mikkangchi a∙bachengatgen ine Chief Minister Conrad K. Sangma aganangaha.
Ia Pepsi karkanako ra∙baanichi kamrangna rimnapanio 90% nigita wilwilao donggipa manderangna cholko on∙angggen ine aganan baksana chu∙gimik sak 500 rangnigita kamna rimnapaniko man∙anggen ine Sangma agandapangaha. Ia company-rangna bilsi 30 na a·arangko on·a tik ka·anio tangka gong crore 6 ko gamanaha ine Sangma u∙iatangaha. Ian North Garo Hills, Mendipathar-o skanggipa karkana ong∙anggen ineba CM aganangaha.
Ia biap-o train station sepangani gimin bosturangko nengrae watrurae sokatna dakchakanggen ine nike Company-rang dingtangmancha Mendipathar-ko seokaha ineba CM parakataha.
