Da∙al salni bako East Garo Hills a∙jani Mangsang Bamil antio, Mangsang Bazaar Managing Committee-ko sriksrik songdrae niamni a∙palo tangka gilaniko raken jegale re·jomaniko dakangaha. Ia re·jomaniko bang·a NGO dolrang jekai FKJGP, JAC, AHAM, aro GSU-rang dakdilangaha jeon bajaro pale sim·e cha·giparang, dokan dakgiparang aro songni manderang bakko ra∙angaha.
Da·o so∙sojengjeng ong·e jegalaniara, batanggimin chango jinmani seokgimin Bazaar Committee member-rangko ra·chakgija, Darugre Constituency-ni MDC Henendro R. Sangma sriksrik an·tangni mandeko Bazaar Committee-ko songe tangka gildraani a·sel ong·aha. Indake ong·anichi re·anggipa July 17 tariko Mangsang Bamil antioniko gitcham managing committee-ni kosako kragija dake tangka gildrakani a·selo doka sataniona sokangpilaha.
Chengonin Bazaar Committee-ko songni manderangni nangnikao pangchake songna man·ode ia changora maina apsanko dakna neng·nikenga ine bang·a manderangan ding·chaoaniona sokaha. Indakgipa kamrangko ka∙aniara niamni a·palo ong·enganina, da·al salo bang·a manderangan krimkro ong·katoke MDC Henendro R. Sangma-ni kosako namnikgijaniko mesokna uni bimangko tarie wa·al so·aniko dakangaha
