A∙doko bijoli wataniko namdapatna aro dingtang dingtang cholrangni bidingo chanchirimna gita Chief Minister Conrad Sangma National Thermal Power Corporation (NTPC) ni Chairman ko New Delhi-o gronganggen ine parakataha. Ia tom∙bimonganio a∙doko solar rangko jakkale bijoli bikotani bidingo ong∙gen ineba u∙inagita man∙aha. Unbaksana CM Solar Mission ko a∙bachengatani bidingo ua International Solar Alliance rangni dilgiparangmingba chanchirimaniko dakanggen ineba aganangaha.
CM Solar Mission ko ia ja ni gisepo a∙bachengatna miksonge gong 100 crore mangnigita chamataniko dakangaha. Ia project ni ning∙ao sorkarini tarigimin bak gittam a∙barang gnang, subsidy ba sorkarini gita gamna nanganirangko komiatgimin, loan ba ra∙chaksoani aro sakprakna on∙a tikatgimin ong∙a. Sorkari bil amma dipete gamna nanganirangko komiatna jotton ka∙anggen ine Chief Minister ku∙watangaha. Ia Mission ni ning∙ao dingtang dingtang songadam, songjinma biaprango, bida nok aro office-rango scheme-ni adita gamna nangarangko sorkari komiate on∙anggen.
