Business Advisory Committee (BAC) tom·aniko matchotani ja·mano, Meghalaya Legislative Assembly-ni Autumn Session-ko August jao sal bongana ong∙atna tik ka∙aniko a·dokni Assembly Speaker Thomas A. Sangma parakataha. Ia Autumn Session-ko August 23 tarikoni a∙bachengate 30 tarikona ong∙atna tik ka∙angaha.
Ia salbongani Autumn Session-o salgittam sorkarini nangarangni gimin golpogrikaniko dakanggen aro salgni Legislature-rangna dingtang dingtang nanganirangni bidingo aganagita cholko on∙angskagen ineba Speaker u·iatangaha.
