Garoland State Movement Committee (GSMC) C.E.C H.Q. Tura, NEHU-ni ning·o Bachelor degree-ni 6 gipa semester porikkako see matchotgimin chatro chatrirangni result-ko ta·rake on·china janapate, NEHU, Shillong-ni Vice-Chancellor Prof. P. S. Shukla-na memorandum-ko on·angaha.
Ia 6 gipa semester-ko poraie porikka see matchotgimin chatro chatrirangni result-ko parakatanio ru·utatanichi uamang bang·a neng·nikanirangko chagrongenga ine janapataha. Ia bilsio Masters degree ba dingtang gadangrango porainagita admission-rangko on·engaha aro mitam institution-rangde admission ra·na on·ani somoi matchote dontongatpilaniko niknagita man·a. Iani gisepon NEHU-o poraigiparangni result-ko tarake parakatjaode bang·a chatro chatrirangan chubata gadango porainagita namgipa cholko gimaataona sokgen ine GSMC dolrang janapangaha.
Indake mikkangchi chatro chatrirangni poraie skie ra·anio namgipa cholko on·a man·agita result-rangko ta·rake parakatna nanga maina result-ko parakatanio ru·utatgenchimode admission ra·anio ja·manchakanisan ong·aigija poraienggipa chadamberangni miksonganiko aro chu·sokaniko cha·sotagitaba ong·gen ine janapangaha.
Ia pilak obostarangko nigrikate chatro chatrirangni aro uamangni nokdangrangni chagrongenggipa neng·nikanirangoniko naljokatna aro maming neng·nika gri mikkangchi chubata gadango poraina cholko man·agita ta·rake kamrangko ka·e 6 gipa semester-ni result-rangko parakatchinagita GSMC dolrang Vice-Chancellor-ko mol·molangaha.
