All Meghalaya SSA Non-Teaching Staffs Association (AMSSANTSA), uamangni man·gni dormaharangko sorkari bariatna man·kujaenganina July 30 tarik chong·motan knal saloni jinma tom·dake dontonggija jingjengataniko dakangna u·iatangaha.
Ia jingjengataniko daknagita drae ka·na nangao ga·akenganiara a·dok sorkari SSA-o kamko ka·giparangna dormaharangko bariataniko 2016 onin dontongatenba chu·sokate on·kujaengani a·sel ong·enga ine AMSSANTSA-ni dilgiparang aganangaha. Battanggimin bilsi 2023-ni State Assembly ong·anio Education Department-nigita SSA-o kam ka·giparangni dormaha bariatani lekkarangko Finance Department-na watatmananiko Rakkam A Sangma parakatahaoba da·ona kingking maming ja·kukon de·kujaenga ine u·ina man·aha.
Sangma-ni agangipa kattarangko AMSSANTSA jegalate, ian State Assembly-ni member-rangna tol·e agane ku·rachakanisan ong·a ine uamang matnange aganataha.