South West Garo Hills, Ampati-o song·a chananio nangchongmotgipa changa sapaniko skie on·agita comprehensive skill training program-ko Meghalaya State Skill Development Society, Department of Labour, Employment & Skill Development, Tourism Department aro Arrosa’s Kitchen bakrime da·aloni a·bachengate on·angaha. Ia program-ko broader project-ni bakgita tourism sector-o manderangko song·a chananio nanggipa changa sapaniko skie ra·aniko bariatna tarigimin ong·a ine u·iatangaha.
Ia program-o dingtang dingtang homestay, restaurant aro fast food-rangoni chu·gimik sak 20 mangnigita skie ra·na skanggipa batch-o bimingrangko segatangaha. Ia course-ko konta 20 na skianiko dakanggen jeon song·a chananio nangchongmotgiparangko u·i ma·siatna bakko ra·giparang skie ra·na man·anggen.
Ia skie ra·ani program-ko ong·atani miksonganiara a·jani dingtang dingtang biaprango tourism-o bak ong·giparangko song·a chananio changa sapaniko skie ra·na aro wilwilao donggipa manderangko tourism-ni a·bako tang·doatanio ku·cholsan ong·e bakko ra·atnagita ong·a. Ia training-ko ong·atanichi bakko ra·giparang gipin a·dokoni ba a·songoni re·baenggipa manderangna nambate dangdike on·a man·gen aro tourist-rangko namgipa cholon bewalo rimchaksoachi chu·ongnikanikoba on·a amgen.
Indakgipa ja·kuko de·anian South West Garo Hills-o tourism ni a·bako namdapatna dakchakanggen jeon tourist-rangna aro wilwilao songdongenggipa manderangna apsan namgniko ra·bana dakchakanggen. Unbaksana tourism-ko tang·doatanichi adita kamrangko on·a aro bading chiwalanio nambata cholrangko ra·baanisan ong·aigija a·doko tourism sector-ko namroro silroroatnaba dakchakani ong·a.
