West Garo Hills Selsella C&RD Block-ni ning∙o PM-KISAN scheme-na dorgastoko gal·giparangko ra·chake scheme-ko on·agita, Agriculture Inspector (AI) Mominur Islam game cha·giparangoniko niamgri tangkarangko ra∙anina songdongenggipa manderang uni kosako matnange District Agriculture Officer-na chittiko see badi ka∙angaha.
Chittio janapatanigitade, ia scheme-na bimung segataniko nirokna mingsa budiko dake game cha∙giparangna ID card-rangko on∙e tangka gong 500 ko ra∙ronga ine u∙ina man∙aha. Uasan ong∙aigija Mominur Islam an∙tangni noktangona game cha∙giparangko okamate kamrangko ka∙e on∙an baksana tangka paisarangko niamgri dabironga ineba u∙iatangaha.
Ma∙mong sorkarini ia PM-KISAN scheme-ko a∙bachengataniara ge∙a gamanio man∙a kragipa aro kangal nokdangrangna tangka paisarangko on∙e dakchake ge∙a gamani gadangko nambatatna miksongani ong∙a. Indake ong∙genchimoba bang∙bata changrangon sorakrini chamatgipa tangka paisarangko kragija jakkalsretronga jekon Agriculture Inspector an∙tangni kam ka∙anio tangkarangko ra∙e aro man∙a kragijagipa nokdangrangonikoba tangkarangko dabie ia scheme-o niamgri napatenga ineba u∙iatangjolaha.
Ia scheme-o segate on∙a game cha∙giparangoniko tangka paisarangko ra∙manahaoba da∙onaba maming kobor dongjani a∙sel uamang maming cholko nikjae badi ka∙na nangaona sokaha ine parakataha. Indake niamgri tangka dabie ra∙aniko nirokate Mominur Islam ni kosako kragipa sastiko on∙china aro mokordomako ka∙angchinaba uamang District Agriculture Officer-ko didiangaha.
