East Garo Hills Rongjeng jolni nangrimgimin NGO-rang chong·motan GSU, GSMC, NGCO, AOSW, ASWA, APA, FKJGP dolni dilgiparang Rongjeng-o adita nirokatna nanggipa kamrangni bidingo a·dokni Chief Minister Conrad Sangma-ko gronge golpogrikangaha.
Uamangni grongeani miksonganiara skanggipao Rongjeng Forest Reserve-ni bolrangko Additional PCCF-gri aro a·dokni Corparation-na maming u·iatagri niamni a·palo auction ka·gimin bolrangko ra·mike, Ranger aro badinggiparangni gisepo apsan ku·monge Rongjeng Forest Reserve-ni bang·a tange dongenggipa bolrangko sal wal salenga ine janapangaha. Indake niamni a·palo bolrangko salenganiko nike Reserve jolo songdongenggipa manderang NGO-rangna u·iatako man·e, Chief Minister baksa golpoe dosi donggipa Officer-rangni kosako am·sandianiko dake kamoniko ra·galchina didiangaha.
Gnigipao ru·uta salrangna jolni NGO dolrang aro United Christian Peace Forum-ni jegalenggipa Simki M. Sangma-ni Rongjeng Government M.E School sambao kuligipa Bonded Warehouse-ko public hearing donggija License-ko tarie skatang kulianina niamo pangchake skulni sepangoniko gipin biapchina ta·rake apjitatchina didiangaha. Iani gisepon niamo pangchake apjitchina ge·etako man·ani ja·manba manijaode Bonded Warehouse-ko chipatchinagita NGO dolrang Chief Minister-ko mol·molangaha.
